සමාන්තර බල සපුරාලිය යුතු දේ
සමාන්තර බල තුනක් යටතේ වස්තුවක් සමතුලිත ව තිබීමට අවශ්‍යතා තුනක් සපුරාලිය යුතු ය.
(i) බල තුන ඒකතල විය යුතු ය
එනම් තුන ම එක ම තලයක පිහිටිය යුතු ය. ක්‍රියාකාරකම 3 හි අවසන් කොටසින් පෙන්වූයේ මෙයයි.
(ii) එක් බලයක් අනෙක් බල දෙකට ප්‍රතිවිරුද්ධ විය යුතු ය
තුන ම එක ම දිශාවට ක්‍රියා කරන්නේ නම් ඒවා අවලංගු කර ගත නොහැක.
(iii) බල දෙකක සම්ප්‍රයුක්තය තුන්වන බලයට සමාන විය යුතු ය
විශාලත්වයෙන් සමාන හා දිශාවෙන් ප්‍රතිවිරුද්ධ විය යුතු ය. එනම් F1 + F2 = W.
තුන් වන කොන්දේසිය කියවන තවත් ආකාරයක්
බල දෙකක් එක ම දිශාවට සමාන්තර ව ක්‍රියා කරන විට ඒවායේ සම්ප්‍රයුක්තය එම දෙකේ එකතුව වේ. එබැවින් තුන් වන කොන්දේසිය කෙළින් ම කියවිය හැක්කේ මෙසේ ය: එක ම දිශාවේ බල දෙකේ එකතුව, ප්‍රතිවිරුද්ධ දිශාවේ එක් බලයට සමාන විය යුතු ය.
සමාන්තර බල තුනක් යටතේ සමතුලිතතාව
වස්තුවක් සමාන්තර බල තුනක් යටතේ සමතුලිත වන්නේ, බල දෙකක සම්ප්‍රයුක්තයට සමාන බලයක් විරුද්ධ දිශාවෙන් යෙදෙන්නේ නම් ය. ඒ සමඟ බල තුන ම එක ම තලයක පිහිටිය යුතු ය.