මූලද්‍රව්‍ය වර්ග කරන්නේ ඇයි?
මේ වන විට මූලද්‍රව්‍ය 115 කට වඩා වැඩි සංඛ්‍යාවක් සොයාගෙන ඇත. ඒවායේ ගුණ වෙන් වෙන් ව අධ්‍යයනය කිරීම ඉතා අපහසු කටයුත්තකි.
මූලද්‍රව්‍යවල හා ඒවායේ සංයෝගවල තොරතුරු ලෝකයේ විද්‍යාඥයින් විසින් නොකඩවා රැස් කරනු ලැබේ. මෙම තොරතුරු සම්භාරය කෙතරම් විශාල ද විවිධ ද යත්, සියලු කරුණු මතක තබා ගැනීම කිසිවෙකුට ත් කළ නොහැක්කකි.
එසේ නම් මෙතරම් කරුණු ප්‍රමාණයක් සමඟ කුමක් කරන්නද?
ඒවා තුළ ඇති පිළිවෙළක් සොයන්න. විවිධ විද්‍යාඥයින් විසින් මූලද්‍රව්‍ය විවිධ ක්‍රම අනුව වර්ග කිරීමට උත්සාහ දරා ඇත. එම උත්සාහයේ අග්‍රගණ්‍ය ප්‍රතිඵලය ආවර්තිතා වර්ගීකරණය (periodic classification) ය.
මූලද්‍රව්‍ය වර්ගීකරණය සඳහා ආවර්තිතා වගුවක් මුලින් ම ඉදිරිපත් කරන ලද්දේ රුසියානු ජාතික විද්‍යාඥයෙක් වන දිමිත්‍රි මෙන්ඩලීෆ් (Dmitri Mendeleev) විසිනි.
මෙයින් පෙනෙන දෙය
හොඳ වර්ගීකරණයකින් ලැබෙන ප්‍රයෝජනය මෙයයි: වෙන් වෙන් ව කතා 115ක් ඉගෙන ගැනීම වෙනුවට, මූලද්‍රව්‍යය පිහිටන ස්ථානය ඉගෙන ගන්න — එම ස්ථානයෙන් එය හැසිරෙන ආකාරය ගැන බොහෝ දේ කියැවේ. මෙම කොටසේ ඉතිරිය එම ස්ථානය කියවීම ගැන ය.