පටක රෝපණය
ශාකයකින් ලබාගත් ඕනෑම ජීවී වර්ධක පටක කොටසක් පාලනය කළ තත්ත්ව යටතේ රෝපණ මාධ්‍ය තුළ වගා කර මාතෘ ශාකයට ප්‍රවේණිකව සර්වසම නව ශාක බිහි කර ගත හැකි ය. එසේ ලබාගත් නව ශාක ක්ලෝනයක් ලෙස හැඳින්වේ.
ඒ සඳහා සාමාන්‍යයෙන් අග්‍රස්ථ අංකුරය, පාර්ශවික අංකුරය හා මූලාග්‍රය වැනි විභාජක ස්ථානවලින් පටක ලබා ගනී — සෛල තව ම විභාජනය වෙමින් පවතින, තව ම එක් දෙයක් වීමට තීරණය කර නොමැති ප්‍රදේශ එය යි.
රෝපණ මාධ්‍යය
පටක රෝපණය සඳහා යොදා ගන්නා රෝපණ මාධ්‍යයේ සුක්‍රෝස්, ඛනිජ ලවණ, විටමින් හා වර්ධක ද්‍රව්‍ය අඩංගු ය. එම මාධ්‍යය ජෙලටිනීමය තත්ත්වයට පත් කර ගැනීමට ඒගාර් යොදා ගනී.
පටක රෝපණය සාර්ථක කර ගැනීමට ජීවාණුහරණ තත්ත්ව ඇති කළ යුතු අතර උෂ්ණත්වය, ආලෝකය වැනි තත්ත්ව පාලනය කළ යුතු ය. භාජනය තුළ ඇති එක ම බැක්ටීරියාවක් හෝ දිලීර බීජාණුවක් ශාක පටකයට වඩා වේගයෙන් වැඩී රෝපණය නැති කර දමයි.
පටක රෝපණයේ දී අනුගමනය කරන ප්‍රධාන පියවර
- මව් ශාකයෙන් ලබාගන්නා වර්ධක පටක කොටස රෝපණ මාධ්‍යයේ තැන්පත් කිරීම.
- වර්ධක පටක කොටසේ කිණකය නම් නව පටකයක් සෑදෙන අතර එම කිණකයෙන් අලුත් මුල් සහ අංකුර වර්ධනය වීමට ඉඩ සැලසීම.
- අංකුර වෙන් කර පරීක්ෂා නළ තුළ තවදුරටත් වර්ධනය වීමට තැබීම.
- අංකුර වගා කටයුතුවලට සුදුසු වන පරිදි පරිසරයට උචිත ලෙස හැඩගැසීමට තැබීම.
රූපයක් එක් කළ යුතුය
ශාක පටක රෝපණය මගින් පහත සඳහන් වාසි අත් කර ගත හැකි ය:
- මව් ශාකයට සර්වසම ලක්ෂණ සහිත දුහිතෘ ශාක බිහි කර ගත හැකි වීම;
- එකවර පැළ විශාල සංඛ්‍යාවක් ලබාගත හැකි වීම;
- කෙටි කාලයක් තුළ පැළ විශාල සංඛ්‍යාවක් ලබාගත හැකි වීම;
- කුඩා ඉඩ ප්‍රමාණයක් තුළ නිරෝගී පැළ විශාල සංඛ්‍යාවක් බෝකර ගත හැකි වීම;
- හිතකර ජානයක් සහිත දෙමුහුම් ශාක පටක කොටසක් පටක රෝපණය මගින් වගා කර නව ශාක විශාල ප්‍රමාණයක් ලබා ගත හැකි වීම.
පැවරුම 14.2
- විවිධ මූලාශ්‍ර යොදාගෙන ශ්‍රී ලංකාවේ පටක රෝපණය සිදුකරන ස්ථාන ලැයිස්තුවක් සකසන්න.
- හැකියාවක් තිබේ නම් එවැනි ස්ථානයකට ක්ෂේත්‍ර චාරිකාවක් සිදුකර පටක රෝපණ ක්‍රියාවලිය අධ්‍යයනය කරන්න.
- ශ්‍රී ලංකාවේ පටක රෝපණය ඇසුරින් වැඩිපුරම බිහිකරන ශාක නම් කරන්න.