එක් බලයක් වෙනුවට බල දෙකක්
තනි බලයකින් වස්තුවක් කරකැවීමට නම්, එම වස්තුව කොහේ හෝ තැනකින් රඳවා තිබිය යුතු ය.
මෙතෙක් අප සලකා බැලූ සෑම අවස්ථාවක ම එසේ රැඳවීමක් තිබුණි. දොර අසව්වලින් රඳවා තිබුණි; ලී පටිය ඉස්කුරුප්පු ඇණයෙන් රඳවා තිබුණි. එම රැඳවීම නොවී නම්, බලය වස්තුව කරකවනවා වෙනුවට එය සරලව ම තල්ලු කර ගෙන යනු ඇත.
අසව්වක් නැති වස්තුවක්
මේසයක් මත නිදහසේ තිබෙන පොතක් සලකන්න. එහි එක් කෙළවරක් තල්ලු කළ විට එය තරමක් කැරකෙන නමුත් ඒ සමග ම ඉදිරියට ද ලිස්සා යයි. එය එක ම තැන රඳවා ගෙන කරකවන්නට ක්‍රමයක් නැත.
බල දෙකක් නම් කෙසේ ද?
එහෙත් එකිනෙකට විරුද්ධ දිශාවලට යෙදෙන බල දෙකක් යොදා, එසේ රඳවා ඇති හෝ රඳවා නැති වස්තුවක් වුව ද කැරකැවිය හැකි ය.
මෙය දෛනික ජීවිතයේ දී ඔබ නිතර භාවිත කරන දෙයකි. සුක්කානමක් කරකවන්නේ එක් අතකින් නොව, දෑතින් විරුද්ධ අතට ය. ජල කරාමයක් හරවන්නේ ඇඟිලි දෙකකින් එකිනෙකට විරුද්ධ ව තල්ලු කිරීමෙන් ය.
මෙම කොටසේ අදහස
විරුද්ධ දිශාවලට යෙදෙන සමාන බල දෙකකට වස්තුවක් කරකැවිය හැකි ය — එය කිසිම තැනකට තල්ලු නොකර ම. එවැනි බල යුගලයකට වෙන ම නමක් ඇත.
ඊළඟ පිටුවේ දී අප එය ලී පටියකින් හා නිව්ටන් තරාදි දෙකකින් පෙන්වා දෙමු.