එක ම දිශාව, වෙනස් රේඛා

ඒක රේඛීය නොවන සමාන්තර බල දෙකක් ක්‍රියා කරන අවස්ථා දෙස බලමු. මෝටර් රථය නැවතත් අප ඉදිරියේ ය.

9.8 රූපයේ පරිදි එක් අයකු විසින් 150 N බලයක් යොදා මෝටර් රථයක් තල්ලු කරනු ලැබුව ද එය චලනය නොවී ය.

නමුත් 200 N බලයක් යොදන තවත් අයකුගේ ද සහාය ලැබුණු විට දෙදෙනා ම විසින් එය තල්ලු කරන ලද අවස්ථාවේ රථය චලනය විය. එසේ වුයේ දෙදෙනා ම විසින් යෙදූ බල දෙකේ සම්ප්‍රයුක්තය රථය චලනයට ප්‍රමාණවත් නිසා ය.

මෙය 9.2 කොටසින් වෙනස් වන්නේ කොහෙන් ද?

මෙම බල දෙක යෙදුණේ එක ම දිශාවට වුවද ඒවා ඒක රේඛීය නොවේ. එම බල මෝටර් රථය මත වෙනස් ලක්ෂ්‍යවල දී යෙදුණු සමාන්තර බල ය. එනම් දිශාව එකකි, එහෙත් ක්‍රියා රේඛා දෙකකි — එක් අයෙක් රථයේ පිටුපස උසින් ද, අනෙකා පහළින් ද තල්ලු කරයි.

ක්‍රියා රේඛා දෙකක් තිබීම එකතුව වෙනස් නොකරයි. ඊළඟ පිටුවේ ක්‍රියාකාරකමෙන් එය තහවුරු කර ගනිමු.