ට්‍රොලියකින් පරීක්ෂා කිරීම
දෙවන නියමයේ භාග දෙක ම සරල පරීක්ෂණයකින් තහවුරු කර ගත හැකි ය.
රූපයක් එක් කළ යුතුය
පළමු කොටස — බලය වෙනස් කිරීම
- තිරස් මේසයක් මත ට්‍රොලියක් තබා එයට රබර් පටියක් සම්බන්ධ කරන්න.
- රබර් පටියේ නිදහස් කෙළවර අල්ලා, එය ට්‍රොලියේ අනෙක් කෙළවර දක්වා ඇදෙන පරිදි අදින්න.
- රබර් පටියේ ඇදුණු කොටස නොවෙනස් ව පවතින පරිදි ට්‍රොලිය සමඟ අත චලනය කරන්න.
- ට්‍රොලිය ත්වරණයෙන් චලනය වන බව නිරීක්ෂණය කරන්න.
දැන් සමාන රබර් පටි දෙකක් සම්බන්ධ කර, දෙක ම පළමු ප්‍රමාණයට ම ඇද පරීක්ෂණය නැවත කරන්න. යෙදෙන බලය දෙගුණයකි. පසුව සමාන පටි තුනක් යොදන්න — බලය තුන් ගුණයකි.
නිරීක්ෂණය
පටි ගණන වැඩි කරන සෑම වතාවක ම ට්‍රොලියේ ත්වරණය ද වැඩි වේ.
එනම් a ∝ F.
දෙවන කොටස — ස්කන්ධය වෙනස් කිරීම
- ට්‍රොලිය මත යම් ස්කන්ධයක් තබන්න.
- එක් රබර් පටියක් පමණක් යොදා, පෙර ප්‍රමාණයට ම ඇද පරීක්ෂණය නැවත කරන්න.
- තවත් ස්කන්ධයක් එකතු කර නැවත කරන්න.
නිරීක්ෂණය
ස්කන්ධය එකතු කරන සෑම වතාවක ම ත්වරණය අඩු වේ — යෙදෙන බලය නොවෙනස් වුව ද.
එනම් a ∝ 1 ÷ m.
රබර් පටිය එක ම ප්‍රමාණයට ඇදිය යුත්තේ ඇයි?
රබර් පටියක් ඇදෙන ප්‍රමාණය එයින් යෙදෙන බලය පෙන්වයි. ඇදුම එක ම නම් බලය ද එක ම ය. පරීක්ෂණයේ දී එකවර එක් දෙයක් පමණක් වෙනස් වන බව සහතික කර ගැනීමට එය අවශ්‍ය ය.