උත්තල දර්පණයක කිරණ
උත්තල දර්පණයකට ද අවතල දර්පණයකට මෙන් විශේෂ කිරණ හතරක් ඇත. නමුත් එහි නාභිය හා වක්‍රතා කේන්ද්‍රය දර්පණය පිටුපස පිහිටන නිසා නීති කතා කරන්නේ ඒවා දෙසට එන කිරණ ගැන ය.
(a) ප්‍රධාන අක්ෂය දිගේ
ප්‍රධාන අක්ෂය දිගේ දර්පණය වෙත එන කිරණ පරාවර්තනය වී එම අක්ෂය දිගේ ම ආපසු ගමන් කරයි.
(b) ප්‍රධාන අක්ෂයට සමාන්තරව
ප්‍රධාන අක්ෂයට සමාන්තර ව පැමිණෙන කිරණ අපසාරීව පරාවර්තනය වේ. එම අපසාරී කිරණ පෙනෙන්නේ දර්පණය තුළ ප්‍රධාන අක්ෂය මත එක් ලක්ෂ්‍යයක සිට එන්නාක් මෙනි; එම ලක්ෂ්‍යය එහි නාභිය වේ.
(c) නාභිය දෙසට
උත්තල දර්පණයේ නාභිය වෙතට එන්නාක් මෙන් පැමිණෙන කිරණ පරාවර්තනය වී ප්‍රධාන අක්ෂයට සමාන්තරව ගමන් කරයි.
(d) වක්‍රතා කේන්ද්‍රය දෙසට
වක්‍රතා කේන්ද්‍රය වෙතට එන්නාක් මෙන් පැමිණෙන කිරණ පරාවර්තනය වී ආපසු එම මාර්ගය දිගේ ම ගමන් කරයි. මෙයට හේතුව වක්‍රතා කේන්ද්‍රයේ සිට දර්පණ පෘෂ්ඨයට අඳින ඕනෑම රේඛාවක් දර්පණ පෘෂ්ඨයට ලම්බක වීමයි.