ආහාර සැතපුම
කිසියම් ආහාරයක ඒකක ස්කන්ධයක් එය නිපදවන ස්ථානයේ සිට පරිභෝජනය කරනු ලබන ස්ථානය දක්වා ගෙවා යන දුර එම ආහාරයේ සැතපුම් අගය ලෙස හැඳින්වේ. අප ආහාර වේලක දී ආහාරයට ගන්නා ආහාර ප්‍රමාණය හා ඒවා නිෂ්පාදනය කර ඇති ස්ථානය අනුව ආහාර සැතපුම වෙනස් වේ.
නිදසුන්: කුරුණෑගල සිටින ඔබට උදේ ආහාරය ලෙස ලබා ගත හැකි දෑ කිහිපයක ආහාර සැතපුම පහත ආකාරයට ගණනය කළ හැකි ය.
(1)
| ආහාරය | සැතපුම් | ලබාගත් ස්ථානය |
|---|---|---|
| නිවුඩු සහල්බත් | 1 | සහල් ඔබේ කුඹුරේ වීවලින් ලබාගත් නිසා |
| අලහොදි | 100 | අල වැලිමඩ ප්‍රදේශයෙන් ලබා ගත් නිසා |
| පොල් | 0 | පොල් ඔබේ වත්තේ ගස්වලින් ලබාගත් නිසා |
| බිත්තර | 10 | බිත්තර ඔබේ ප්‍රදේශයේ ගොවිපොළකින් ලබාගත් නිසා |
| එකතුව | 111 |
(2)
| ආහාරය | සැතපුම් | ලබාගත් ස්ථානය |
|---|---|---|
| හාල් පිටි ඉඳි ආප්ප | 85 | සහල් පොලොන්නරුවේ වීවලින් ලබාගත් නිසා |
| පරිප්පු හොදි | 925 | පරිප්පු ඉන්දියාවේ මයිසූර් ප්‍රදේශයෙන් ලබාගත් නිසා |
| පොල් | 0 | පොල් ඔබේ වත්තේ ගස්වලින් ලබාගත් නිසා |
| පොල් සම්බෝල | 185 | මිරිස් යාපනය ප්‍රදේශයෙන් ලබාගත් නිසා |
| එකතුව | 1195 |
(3)
| ආහාරය | සැතපුම් | ලබාගත් ස්ථානය |
|---|---|---|
| පාන් | 9340 | පිටි ඇමෙරිකාවේ තිරිඟුවලින් ලබාගත් නිසා |
| මාළු හොදි | 44 | මාළු මිගමුව ප්‍රදේශයෙන් ලබාගත් නිසා |
| පොල් | 0 | පොල් ඔබේ වත්තේ ගස්වලින් ලබාගත් නිසා |
| පොල් සම්බෝල | 800 | මිරිස් ඉන්දියාවේ චෙන්නායිවලින් ලබාගත් නිසා |
| එකතුව | 10184 |
ආහාරවල ආහාර සැතපුම කෙටි වන තරමට තිරසාර බව හා පරිසර හිතකාමී බව වැඩි ය. මේ නිසා අප ගන්නා ආහාරවල ආහාර සැතපුම් අගය කෙටි කර ගැනීමට කටයුතු කළ යුතු ය.
දුර වැදගත් වන්නේ ඇයි
ආහාරයක් ගමන් කරන සෑම සැතපුමක් ම නැවක, ලොරියක හෝ ගුවන් යානයක ඉන්ධන දහනය කරමින් එහි කාබන් පා සටහනට එකතු වේ; දිගු ගමන්වලට වැඩි ඇසුරුම් හා ශීතකරණය ද අවශ්‍ය වේ. 3 වන ආහාර වේල 1 වන වේල මෙන් අනූ ගුණයක් පමණ වන අතර ඒ බොහෝ දුරට ආනයනික තිරිඟු නිසා ය — එය වැඩි පෝෂණයක් ද නොදෙයි. සෘතුවට, අසල වගා කළ ආහාර ගැනීම දේශීය ගොවීන්ට සහාය වන අතර රට තුළ මුදල් ද රඳවා ගනී.
කෙටි වන තරමට හරිත ය
ආහාර සැතපුම ආහාර අප වෙත ළඟා වීමට කොතරම් දුරක් ගමන් කරයි දැයි මනියි; දුර කෙටි වන තරමට ආහාර වේල වඩා තිරසාර වේ.