ධාරා වර්ධකය

අවශ්‍ය ද්‍රව්‍ය: 2SD400 (D400) ට්‍රාන්සිස්ටරයක්, 2.5 V විදුලි පන්දම් බල්බ දෙකක්, 3 V සහ 6 V බැටරි කවර දෙකක්, 1.5 V වියළි කෝෂ හයක්, ස්විච්ච දෙකක් (බොත්තම් ස්විච්ච වඩා යෝග්‍ය වේ), 10 kΩ පරිමා පාලකයක් (Volume controller) සහ පරිපථ පුවරුවක්

මෙහි S₁ ස්විච්චය, 3 V බැටරිය V_R පරිමා පාලකය හා L₁ බල්බය, ප්‍රදාන පරිපථයේ ඇති අතර 6 V බැටරිය, S₂ ස්විච්චය සහ L₂ බල්බය ප්‍රතිදාන පරිපථයේ පිහිටයි. බැටරි නිවැරදි ලෙස සවි කළ යුත්තේ S₁ හා S₂ ස්විච්ච විවෘතව (off) ඇති විටය. පළමුව S₁ සංවෘත (on) කොට L₁ බල්බය යන්තමින් දැල්වෙන සේ V_Rහි ප්‍රතිරෝධය සීරුමාරු කරන්න. පහත වගුවේ දැක්වෙන ආකාරයට S₁ හා S₂ ස්විච්ච විවෘත සහ සංවෘත කරමින් බල්බවල දීප්තිය නිරීක්ෂණය කොට වගුව පුරවන්න.

• ප්‍රදාන පරිපථයේ ධාරාවක් ගලන විට පමණක් ප්‍රතිදාන පරිපථයේ ධාරාවක් ගලයි.
• ප්‍රතිදාන පරිපථයට විභව අන්තරයක් සැපයුව ද ප්‍රදානයේ ධාරාවක් නොගලයි නම් ප්‍රතිදානයේ ධාරාවක් නොගලයි.
• ප්‍රදානයේ කුඩා ධාරාවක් ගලන විට (L₁ බල්බය අඩු දීප්තියකින් දැල්වෙන විට) ප්‍රතිදානයේ විශාල ධාරාවක් ගලයි (L₂ බල්බය වැඩි දීප්තියකින් දැල්වෙයි). ප්‍රදානයේ ධාරාව පාදම ධාරාව I_B ලෙස හඳුන්වන අතර ප්‍රතිදානයේ ධාරාව, සංග්‍රාහක ධාරාව I_C ලෙස හඳුන්වනු ලැබේ.