විලීන සෝඩියම් ක්ලෝරයිඩ්
ඉහත සම්මුතිවලට අනුව, කාබන් ඉලෙක්ට්‍රෝඩ යොදා විලීන සෝඩියම් ක්ලෝරයිඩ් විද්‍යුත් - විච්ඡේදනය කිරීමේ දී සිදු වන ප්‍රතික්‍රියා පුරෝකථනය කරමු.
රූපයක් එක් කළ යුතුය
ඍණ ඉලෙක්ට්‍රෝඩය අසල
විලීන ද්‍රවය තුළ ඇති එක ම ධන අයන වර්ගය වන Na+(l) ඍණ අග්‍රය වෙත ආකර්ෂණය වේ. එහි දී Na+(l) අයන, ඉලෙක්ට්‍රෝන ලබා ගෙන සෝඩියම් ලෝහ පරමාණු (Na) බවට පත් වේ. Na+ අයන ඉලෙක්ට්‍රෝන ලබා ගෙන ඔක්සිහරණය වූ බැවින් මෙය කැතෝඩ ප්‍රතික්‍රියාව වේ. මේ අනුව ඍණ ඉලෙක්ට්‍රෝඩය කැතෝඩය වේ.
Na+ (l) + e → Na (l)
(1)
ධන ඉලෙක්ට්‍රෝඩය අසල
ධන ඉලෙක්ට්‍රෝඩය වෙතට ද්‍රවයේ ඇති එක ම ඍණ අයනය වන Cl-(l) අයන ආකර්ෂණය වේ. එහි දී Cl-(l) අයන ඉලෙක්ට්‍රෝන පිට කරමින් ක්ලෝරීන් අණු (Cl2) බවට පත් වේ. ක්ලෝරයිඩ් අයන ඉලෙක්ට්‍රෝන පිට කරමින් ඔක්සිකරණය වූ නිසා මෙය ඇනෝඩ ප්‍රතික්‍රියාව වේ. මේ අනුව ධන ඉලෙක්ට්‍රෝඩය ඇනෝඩය වේ.
2Cl- (l) → Cl2 (g) + 2e
(2)
සමස්ත විද්‍යුත් - විච්ඡේදන ප්‍රතික්‍රියාව, (1) සහ (2) අර්ධ ප්‍රතික්‍රියා සුදුසු පරිදි එකතු කිරීමෙන් ලබා ගත හැකි ය. (2) හි ඉලෙක්ට්‍රෝන දෙකක් ද (1) හි එකක් පමණක් ද ඇති බැවින් පළමුව (1) දෙකෙන් ගුණ කෙරේ; ඉන්පසු දෙපස ඇති 2e කැපී යයි.
2Na+ (l) + 2e → 2Na (l)
2Na+ (l) + 2Cl- (l) → 2Na (l) + Cl2 (g)
(1) × 2 = (3); ඉන්පසු (2) + (3)
ඉහත සාකච්ඡා කළ විද්‍යුත් - විච්ඡේදන ප්‍රතික්‍රියාව, කාර්මික ව සෝඩියම් ලෝහය නිස්සාරණය කිරීම සඳහා භාවිත කරන ඩවුන්ස් කෝෂයේ සිදු වන ප්‍රතික්‍රියාව වේ. මෙම ක්‍රමය, ඔබ ඉදිරියේ දී වඩාත් සවිස්තර ව හදාරනු ඇත.
විලීන ලුණු සෝඩියම් හා ක්ලෝරීන් දෙයි
Na+ හා Cl- පමණක් ඇති විට කැතෝඩයේ සෝඩියම් ද ඇනෝඩයේ ක්ලෝරීන් ද සෑදේ.